Það má með sanni segja að tillaga séra Baldurs Kristinssonar (fyrrverandi biskupsritara og prests í Þorlákshöfn) um að Þjóðkirkjan ætti að gangast undir vald páfa hafi valdið nokkurri undrun meðal Íslendinga. Frétt þessa efnis var flutt í kvöldfréttum Stöðvar 2 þann 5. mars. Þar réttlætti séra Baldur þessa hugmynd með tilvitnun í Efesusarbréfið og með þeirri staðreynd að með þessum hætti væri hægt að sporna við stöðugum og viðvarandi fækkun í Þjóðkirkjunni en Baldur Kristinsson tilheyrir þeirri kirkjudeild.
Ég verð að viðurkenna að sjaldan eða aldrei hef ég heyrt vitlausari hugmynd á ævi minni. Ég ætla að ganga svo langt að fullyrða það þetta sé vitlausasta hugmynd í safnhaug vitlausra hugmynda sem komið hafa frá prestum Þjóðkirkjunnar.
Baldur vil s.s redda málunum með því að gangast undir vald páfans í Róm. Ég gæti trúað því að Baldur vildi skýla sér bakvið þann rúma milljarð manna sem tilheyra rómversk katólska söfnuðinum á heimsvísu. Hann er sennilega þreyttur á öllu rausi um fækkun í kirkjudeildinni sinni. -Eða hvað?
Er það kannski sú staðreynd að katólar neita að vígja konur til prestsembætta sem heillar séra Baldur svo mikið? Er það glysið og gulli skreyttar dýrlingamyndirnar sem vekja hjá honum guðlega “stemningu”. Eða er það kannski guðfræði katólanna? Skoðum hana aðeins.
Katólskir trúa því að allir menn séu fæddir syndarar. Að til séu guð á himninum sem er skaparinn, er alltumlykjandi og ástundar regluleg inngrip inn í líf manna. Þessi inngrip kallast kraftaverk og er heil deild í Vatíkaninu sem skráir og staðfestir kraftaverk. Þessi kraftaverk eru oft og tíðum tengd styttum sem taka upp á því að seyta frá sér líkamsvessum. Blóð og tár eru að því er virðist vinsælustu tæki hins almáttuga guðs katólanna til að minna á sig. En eins kaldhæðið og það kann að hljóma eru það einmitt blóð og tár sem einkenna katólskuna öðru fremur. Engin trúarbrögð í samanlagðri mannkynssögunni eiga sér blóðugri sögu. Engin! -Þennan arf vill séra Baldur taka opnum örmum.
Dýrlingar skipa mikilvægan sess í katólskum sið og það eru yfir 10.000 einstaklingar sem hafa öðlast stöðu dýrlinga. Þeir eru flokkaðir í 7 flokka eftir hvað þeir eru merkilegir en merkilegastir eru s.k “verndardýrlingar”. Á þá er hægt að heita gegn ýmsum kvillum. Þjáist maður t.d af fótverkjum er gott að biðja til heilags Servatíusar. Hann er einnig verndardýrlingur rotta og músa! Ef einhver er blankur/blönk er gott að biðja til heilagrar Macrinu. Svona er hægt að halda endalaust áfram. Enda verndardýrlingar yfir 1500 talsins. Heilög Dymphana á víst að gagnast þeim sem þjást af ranghugmyndum. Spurning um að séra Baldur ætti að biðja til hennar?
Ógeðfeldasta birtingarmynd hinnar furðulegu katólsku guðfræði eru helgigripir. Þeir eru flokkaðir í 3 hópa eftir því hve merkilegir þeir eru. Í fyrsta hópnum eru gripir sem eru raktir beint til Krists og líkamlegra leifa dýrlinga (bein, hár, útlimur osfr) oft eru líkamsleifar píslarvotta í þessum hópi. Hönd heilags Stefáns, Ungverjalandskonungs nýtur sérstakrar hylli vegna þjóðfélagsstöðu hans sem þjóðhöfðingja. Í öðrum hópi helgigripa eru t.d sokkar viðkomandi dýrlings, peysa, eða hanski. Þriðji hópur helgigripa innifelur hluti sem snertu dýrlingin eða lín sem notað er til þess að færa helgigripinn úr stað. Þetta er semsagt guðfræði sem séra Baldur vill taka upp. Er það furða að sumir þjóðkirkjuprestar hafi misst úr slag þegar þeir heyrðu tillögu Baldurs.
Fyrir utan þessa óhuggulegu helgigripadýrkun er annað sem ætti að vekja óhug hjá öllu ærlegu fólki. En það er hið kynferðismisbeitandi eðli hinnar katólsku kirkju. Prestum katólsku kirkjunnar er bannað að ástunda kynlíf og sjálfsfróun. Þetta hefur orðið til þess að margir þessara presta virðast hafa klikkast með hroðalegum afleiðingum. Það var fyrir um 15 árum að fyrstu ásakanir á hendur katólskum prestum komu í ljós. Ásakanir um hroðalega kynferðisglæpi gangvart börnum. Fyrstu ásakanirnar komu í ljós í Bandaríkjunum. Fyrst í á austurströndinni svo var eins og flóðgátt hneykslismála æddi yfir katólska söfnuðinn í Bandaríkjunum. Alls munu málin skipta hundruðum og opinberlega hefur katólska kirkjan viðurkennt að hafa greitt yfir 500 miljónir dollara í skaðabætur til fórnarlamba þessa kynferðisofbeldis. Þetta gera yfir 34 þúsund miljónir íslenskra króna. Skömmu eftir að þessi bylgja hneykslismála skók hina amerísku katólsku kirkju komu upp sambærileg mál í Suður-Ameríku og Evrópu. Félagsfræðingar halda því fram fullum fetum að kynferðismisnotkun í katólsku kirkjunni sé ekki tilviljun heldur sé þessi kynferðismisbeiting í eðli hennar. Að öðruvísi geti kirkjan ekki verið. Það óhuggulega við þetta er að enginn veit fyrir víst hve lengi þessir glæpir hafa átt sér stað. –Er þetta kerfi sem séra Baldur vill taka upp á Íslandi?
Kvenfyrirlitning hinnar katólsku kirkju er landlæg og furðulegt að konur skuli yfirleitt hafa geð í sér að tilheyra þessu ógeðfelda, kvenhatandi apparati. Konur geta t.d ekki orðið prestar í katólskum sið. Þær eru einfaldlega ekki nógu tengdar guði. Á móti hefur verið bent að helsti dýrlingur katóla sé kvenkyns. María Mey. En skoðum aðeins Maríu og hvað hún stendur fyrir. Bent hefur verið á að í Maríu kristallist kvenhatur katóla gagnvart konum. Hún er t.d alveg laus við hið “holdlega” í konum. (en “holdið” er óhreint skv guðfræði katóla) Hún hefur t.d ekki samfarir þegar Jesú var getin! Hún er “syndlaus”. María er einskonar draumakona karlrembunnar. Hún fórnar sér endalaust fyrir karlinn/guð, er alltaf til að taka á sig byrðar (fyrir karlinn/guð). Maríumyndin er sennilega eitthvað mest kvenkúgandi fyrirmynd sem til er í heiminum. Ein birtingamynd Maríudýrkunar er nunnustarfið en það er talið sérlega göfugt í katólskum sið. Að helga sig tilbeiðslu guðs/karlsins og "hafna heiminum". Sagt hefur verið að María sé einskonar erkitýpa fyrir mömmu karlrembunnar. Óhugsandi að "mamma" stundi kynlíf, hafi langanir, eigi sér drauma og þrár. Mamma á bara vera uppá einhverjum stalli sem enginn nær til. 
Eins sorglegt og það kann að hljóma munu vera til a.m.k 3 skrín sem innihalda forhúð Jesú.–Maríudýrkun er væntanlega hluti af því sem séra Baldur vill taka upp.
Fræg er sagan þegar Jóhannes II páfi var skotinn af tyrkneskum geðsjúklingi í brjóstið. Eftir 6 klukkutíma aðgerð á spítala kom Jóhannes því áleiðis til fjölmiðla að Mærin frá Loudres hefði stýrt kúlunni þannig að lífi hans var borgið. Nákvæmlega mærin af Loudres. Spurning um hvort hinir 10.000 dýrlingarnir voru í mat á þeim tíma sem tilræðið var framið? En af hverju greip mærin frá Loudres ekki inn í atburðarásina fyrr? Hví stöðvaði mærin frá Loudres ekki tilræðismanninn áður en hann lét til skarar skríða? Og kannski stærsta spurningin. Hvers vegna þakkaði Páfi ekki læknunum sem fjarlægðu byssukúlurnar úr honum?
-Ætli séra Baldur hafi svör við því?
ég er búin að hugsa innihald þessarar greinar margoft yfir bara til að hneykslast á þessari fáránlegu hugmynd, haha, fínt að ég er ekki sú eina sem hugsar þetta. Ég hef meiraðsegja verið að kynna mér kaþólsku kirkjuna og þá verður þetta bara enn óskiljanlegra! þetta er skemmtilega sett upp í greininni
Þetta er án efa HEIMSKULEGASTA HUGMYND ALLRA TÍMA
Hérna er á ferðinni trúfélag sem dýrkar uppþornaða líkamshluta.
Hvað getur maður sagt?
Ég verð að skrifa þetta aftur. (ég trúi varla því sem ég skrifa...)
þetta trúfélag dýrkar
U P P Þ O R N A Ð A L Í K A M H L U T A......!!!
Uppþornaða líkamshluta gott fólk...
"Heilög Dymphana á víst að gagnast þeim sem þjást af ranghugmyndum. Spurning um að séra Baldur ætti að biðja til hennar?"
he he he he he... þetta er snilld!
Ég er líka mikið aðdáendi heilagrar Barböru sem heldur sérstökum hlífiskildi yfir stórskotaliðum svo þeir megi nú hitta betur.
Held að sumum mönnum sé bara ekki bjargandi, þessi hugmynd er ein sú vitlausasta sem ég heyrt lengi!!
Blessuð og sæl, ég bara svona rakst inná þessa síðu, er sjálfur mjög trúaður, en það sem þið eruð að tala um er það sama og ég tala um. Við verðum að berjast gegn þróun kirkjunnar á íslandi. Ég skammast mín ekkert á því að trúa á Guð og Jesú Krist, en ég skammast mín fyrir svona fólk sem kallar sig kristna, ég biðst afsökunar fyrir hönd allavega nokkra kristinna manna hér á landi, hvernig við höfum reint að stjórna fyrirtæki Guðs. Þannig ef þið hjálpið til við að berjast gegn kirkjunni eruð þið að berjast fyrir Guð minn, Amen.. Kirkjan eins og Guð vill hafa hana hefur ekki starfað rétt síðan Constantin keisari var við völd í Róm eh um 250-350 efk. Bræður, Ég er viss um að Guð minn sé að ýta undir svona hugsanir og svona frelsi eins og þið hafið. Markmið mitt er ekki að reina að fá neinn til þess að trúa á minn Guð en sýna ykkur að ef Hann er til, er Hann líka fyrir trúleysingja.. Ef Guð er til er hann stærri en trúin okkar. Þannig ég blessa ykkur og kanski ef þið viljið leifa mér, þá væri ég til í skrifa meira á þessa síðu. Annars vildi ég ekki móðga neinn. kv. stebbi
ps, rómverska kirkjan og hennar leiðir til þess að stjórna og kúa fólk, hefur ekkert gott gert fyrir þennan heim, bara tekið frelsið frá fólkinnu. Trúabröð eru ekki af Guði, Hann er of stór fyrir þau.
Þú mátt skrifa eins og þú vilt en hafðu það í huga að beina skrifum þínum að efni greinanna sem eru til umræðu en ef þú hefur eitthvað annað að segja sem tengist ekki neinni grein þá bendi ég þér á spjallborðið okkar sem er aðgengilegt af forsíðunni.
khomeni - já ég var einmitt að hugsa um uppþornuðu líkamshlutana LENGI eftir að ég fór héðan sko, hahaha ótrúlegt!
-600 ára tánögl er sett í gullskrín og sett með viðhöfn fyrir framan hóp fólks sem kyssa skrínið.
-Ár eftir ár.
Hluti af fingri, framhandarbein, fótsigg, tönn, hluti af kjálka, rifinn hanski, viðarbútur, sög, húðpjatla, hauskúpa, rifbein, koddi, fjaðurpenni, skór, næla, snæri, afsöguð hendi, exi, aska.........
Allt þett er dýrkað og nýtur virðingar í katólskum sið. -líka á Íslandi.
Í greininni er víða komið við. Auk þess að andmæla hugmynd sr. Baldurs gagnrýnir greinarhöfundur kraftaverk, heiðrun dýrlinga, helgigripi, einlífi presta og Maríu mey. Ég mun leitast við að svara þessu skipulega og í sem stystu máli:
Kraftaverk:
Litið er svo á að atvik sem geta átt tilkall til þess að vera talin sérstakt máttarverk Guðs þurfi að rannsaka til að greina kjarnann frá hisminu. Leitað er að náttúrlegri skýringu á atvikinu fyrst og ef engin slík finnst þá er gefin út yfirlýsing um að hinum trúuðu sé heimilt að líta svo á að um kraftaverk sé að ræða. Kraftaverkin breyta samt engu um kristna kenningu. Kraftaverkin eru fyrst og fremst vísbending um áskorun frá Guði en ekki inngrip, vegvísir en ekki redding.
Heiðrun dýrlinga:
Athugum hvað Jón Rafn Jóhannson skrifar um þetta:
Víkjum fyrst að orðinu heiðrun, að auðsýna einhverjum heiður. Í fornkirkjunni var þetta nefnt duleia á grísku. Maríu Guðsmóður er sýnd sérstök heiðrun. Þetta nefndu hinir fornu feður og mæður kirkjunnar á grísku hyperduleia eða sérstaklega mikla heiðrun. Þegar á annarri öld auðsýndu þeir Guðsmóðurinni slíka hyperduleia eins og við sjáum til að mynda í skrifum Tatíans (d. 160). Frá upphafi og fram á daginn í dag er gerður strangur munur á latreia eða tilbeiðslu og heiðrun. Guð einn í Þrenningu er tilbeðinn: Honum einum er kristnum mönnum ætlað að tilbiðja.[1]
Helgigripir:
Það er staðreynd að jafnvel elstu katakomburnar (neðanjarðarhvelfingar), þar sem kristnir menn komu saman, voru skreyttar myndum af Kristi og helgum mönnum. Sá siður hefur verið við líði allt frá dögum frummanna að gera myndir af þeim sem þeim þótti vænt um og þeir mátu mikils, einkum látum mönnum. Svokallaðir 'myndbrjótar' vitna ævinlega í Gamla testamentið, sem banni slíka myndagerð. En í því sambandi gleymist þeim að lögmál Gamla testamentisins um guðsdýrkun féll úr gildi þegar hinn nýi sáttmáli kom til sögunnar...Eftir að Guð hafði sjálfur látið 'ímynd' sína í Kristi ljóma í þessum heimi (sjá Kólossusbréfið) og boðað fyrir hann að tilbiðja skyldi Guð í 'anda og sannleika', var ekki lengur sama hætta á misnotkun mynda og áður. Hver einasti kaþólskur maður veit að menn heiðra ekki myndina sem mynd, heldur þann sem hún sýnir.(Úr bókinni Vegurinn Sannleikurinn og lífið eftir Krenzer. Útg. KKÍ, Reykjavík 1981)
Sama má segja um aðra helgigripi. Þeim er haldið til haga í kærleiksríkri minningu um hina horfnu, hetjulegar dyggðir þeirra og líferni. Hvað varðar þessa þrigga hópa skiptingu sem greinarhöfundur heldur fram. Getur greinarhöfundur nefnt heimildir fyrir þessu aðrar en Wikipediu?
Einlífi presta og bann við vígslu kvenpresta:
Kristur valdi postulana sjálfur og þeir voru allir karlar. Það hljómar ekki sannfærandi að velta sök kynferðisglæpamanna í hópi presta á samfélagið. Getur eitthvað samfélag verið sekt sem heild, þ.e. aðrir en gerendur og þeir sem hylma yfir með þeim? Nú eru það trúlega í mörgum tilfellum kaþólikkar sem vinna af því að afhjúpa og uppræta glæpina. Greinarhöfundur skrifar:
Félagsfræðingar halda því fram fullum fetum að kynferðismisnotkun í katólsku kirkjunni sé ekki tilviljun heldur sé þessi kynferðismisbeiting í eðli hennar. Að öðruvísi geti kirkjan ekki verið.Hvaða félagsfræðingar í fleirtölu eru það sem halda þessu fram? Hvar eru heimildirnar?
María mey:
Greinarhöfundur skrifar:
María er einskonar draumakona karlrembunnar. Hún fórnar sér endalaust fyrir karlinn/guð, er alltaf til að taka á sig byrðar (fyrir karlinn/guð).
Þetta er bjöguð sýn á Maríu mey. Hún er einmitt oftast sýnd sem móðir en ekki eiginkona og heiðruð sem slík, þ.e. sem móðir. Í henni er móðurhlutverkið vegsamað og konunni og því börnunum einnig tryggð örugg staða og vernd samfélagsins.
Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.
Aiwaz (meðlimur í Vantrú) - 26/03/07 09:43 #
Þessi galna tillaga Séra Baldurs sýnir hve hallærislegt apparat ríkiskirkjan er. Svona "Nýtt afl" trúarbragðanna sem vill sameinast alvöru flokki til að lifa af. Þetta er ein birtingarmynd endaloka kristindóms sem er að fjara út hægt og rólega. Íslam verða hin ríkjandi trúarbrögð alls staðar í heiminum eftir 40 - 60 ár (nema kannski Suður-Ameríku).