Er þetta eitthvað grín?

Hún er mögnuð þessi viðkvæmni. Alveg hreint kynngimögnuð! Á þessari vefsíðu hefur verið tekið á ýmsu bulli, s.s. sköpunartrú, vísindakirkjunni, heilun og DNA-heilun, tunglsýki, afhommun, stjörnuspeki, falun gong, talnaspeki, geimverutrú, draugum og alls konar kjaftæði sem ýmist er kennt við nýaldarspeki eða óhefðbundnar lækningar. Vissulega fá þessir pistlar einhver viðbrögð, en þau viðbrögð jafnast ekkert á við hinn hörundsára og kærleiksríka kryssling.

Hvaða trúarbrögð , eða öllu heldur ranghugmyndakerfi, eru fyrirferðamest í þessu þjóðfélagi, hindurvitni sem hafa úr allsvakalegum peningafjárhæðum úr að moða til að koma boðskap sínum, skoðunum og kjaftæði á framfæri, hindurvitni sem var ástæða þess að nokkrir trúlausir einstaklingar sögðu einfaldlega að nú væri meira en nógu andskoti mikið komið? Hin lúterska-evanglíska ríkistudda kristintrú, hvað annað!

Ekki ætla ég að bera virðingu fyrir félagi sem telur sig vera á siðferðislega hærri stalli en aðrir af því siðferði þeirra er byggt á 2-3000 ára gamalli, óhagganlegri bókarskruddu, en er vitaskuld opin fyrir allskonar misvitrar og í hæsta lagi fáránlegar túlkanir og grænsápuþvott. Þessi hindurvitni telja sjálfum sér og öðrum trú um að hér sé verið að ræða um kærleika, umburðalyndi og virðingu fyrir öllu fólki. Öllu fólki! Nema sumu, t.d. þeim sem aðhyllast önnur trúarbrögð, samkynhneigðum og að sjálfsögðu trúlausum einstaklingum.

Kærleikur? Minn rass! Umburðarlyndi?! Fokking búlsjitt Virðing?!? Viðbjóðsleg lygi! Og svo ef það er drepið á þessu umbúðarlaust, þ.e.a.s. að hér sé um ósannsögli og þversagnir og bölvað kjaftæði að ræða, fært fyrir því rök og bent á tiltölulega traustar heimildir (t.a.m. fyrrgreindan doðrant), þá er sá hinn sami óalandi, óferjandi og óumburðarlyndur dóni og dusilmenni. Og hvaða ástæðu hefur sá maður er fær þessar úthúðanir og dónaskap að sýna viðkomandi “kærleik og gleði” virðingu? Sá hinn sami hefur nákvæmlega enga ástæðu.

Maður er orðinn svo þreyttur á þessari uppgerðarviðkvæmni, barnlega væli og þessari óforskömmuðu heimtingu á virðingu fyrir “persónulega trú á minn persónulega gvuð” og álíka hjali. Ef þessir trúmenn, prestar, prelátar, djáknar og vælukjóar þola ekki eilitla gagnrýni þá er eitthvað að! Hjá þeim. Má ekki aðeins pota í þessa lífskoðun án þess að þetta lið tapi sér í krókódílatárum, missi jafnvel saur, við smá lestur á beinskeyttri gagnrýni? Eru þessi blóðugu trúarbrögð svo ægilega viðkvæm að ekki megi skoða það í öðru ljósi, þ.e.a.s. að þetta er bara bull? Standa þessar skoðanir og lífssýn á svona gífurlega völtum brauðfótum að þeir finna sig knúna til að grenja einsog nýfædd smábörn?

Verra er það nú vælið hjá hinum afar hófsömu og sinnulausu trúleysingjum og kredduföstum óvissumönnum sem einnig vilja sjá og heyra þessa virðingu! Að skrúfa aðeins niður í gífuryrðunum og reyna ræða þetta á hófsaman og diplómatískan hátt, eða ganga svo langt að segja “sko, ég er nú alveg trúlaus, en þessir vantrúardónar eru sko alveg milljón sko! Hvernig nenna þeir þessu?! OMG! Þeir ættu betur að hætta þessu og gera eikvah uppbyggilegt. Skömm.” Hvernig nennum við þessu? Við höfum ærna ástæðu til, helvítin ykkar!

Kirkjunnar menn ofsækja skólabörn, börn frá 4 til 14 ára. Tíu moðerfokking ár við að fylla huga þeirra af þjóðsögum og ævintýrum eins og um sannleika sé að ræða ,einhverja bölvaða og óforskammaða vitleysu. Fyrst og fremst er verið að ræða um það að almáttug, alvitur og algóð vera sem er handan alls og einskis fylgist með öllum gjörðum mannfólksins. Og það er bara dropi af hafsjó heimskunnar sem þeir halda að börnunum. Það versta er náttúrulega að segja að manneskjan er svo ægilega ófullkomin að við þurfum handleiðslu drauga og uppvakninga til þess að lifa fullkomnu lífi, annars muntu stikna í bakaraofni, í "raunverulegu" helvíti, að eilífu. En fallegt af þeim að segja að börnin eru, í megindráttum, umkomulausir aumingjar og ósjálfbjarga alveg fram að dauða. Þessi stofnun og starfsmenn hennar eru svo gegnumsýrð af þessari ranghugmynd að menn eru bókstaflega það fjandi bilaðir að þeir halda að það sé verið að gera börnunm greiða með því að telja þeim trú um að þetta sé satt! En vita ekki að verið er að opna farveg fyrir þeirri trú að heilun, blómadropar, álfar, einhyrningar og ámóta nýaldarvitleysu virki og séu til. Þetta kallast að forheimska.

Til hvers að fara til læknis með fótbrot? Bara skella nokkrum orkukristölum yfir þetta. Mættirðu seint í vinnu og misstir úr tíma? Þér var greinilega rænt af geimverum. Ertu með krónískt mígreni? Láttu hnykkja bakið! Saknarðu einhvers nákomins ættingja sem er fallin frá? Nú, spjallaðu við miðill, hann reddar þessu. Og hefur einhver áhuga á að búa í þjóðfélagi með borgurum sem eru til hópa slefandi vanvitar sem gleypa við svona vitleysu á hverjum degi, gagnrýnislaust?

Síðan er það ofstækið sem á víst að ríkja þessari síðu og í þessum félagskap; uppnefni, blótsyrði, níðingsháttur, nöldur og að hinu ógleymdu og klassísku „að neyða annað fólk til að skipta um skoðun“ ekki sé minnst á að „troða vantrúnni ofaní kokið á fólki“ og annað fleipur og fimbulfamb. Þegar ajatolla Karl Sigurbjörnsson er uppnefndur, t.d. fífl fyrir að flengja fram horbjóðinum „trúleysi jafngildir siðleysi!“, þá eru viðbrögðin afar bókstafstrúarmúslímsk, ef svo má segja, svona einsog maður væri að teikna skopmynd af Múhaðmeð. Eina sem vantar er bóka- og brúðubrennur og mótmælaspjöld sem á standa "Afhöfðið þá sem telja að kristin trú sé ekki kærleiksrík og umburðarlynd!" fyrir framan heimili meðlima Vantrú.is.

Sökum viðkvæmni sumra þjóðfélagsþegna hefur ritstjórnin neyðst til að strika yfir nokkur orð sem gætu farið fyrir brjóstið á trúuðum einstaklingum. Við viljum taka það fram að yfirstrikuðu orðin eru ekki fyrir viðkvæmar sálir.