Tæknivæddar miðaldir

Bábiljur tröllríða samfélagi okkar nú um stundir. Dæmi um þetta er nýleg yfirlýsing lögreglunnar um að ástandið á menningarnóttu hafi mátt rekja til þess að tunglið var fullt - daginn áður. Og í kjölfarið fylltust fjölmiðlarnir af blaðrinu í Gunnlaugi stjörnuspekingi sem notaði tækifærið til að fylla hugi landsmanna af eintómum kellíngabókum, auk þess að upphefja eigin göfgi með því að þykjast vera ofsa næmur á kvartelaskipti tunglins..

Þessi falsari laug því að okkur að hann gæti séð breytingar á yfirbragði fólks inni á skemmtistöðum fáeinum mínútum eftir að tungl var orðið fullt og byrjað að minnka aftur. Stemningin átti að hafa drepist með það sama og allir urðu rosa blúsaðir eitthvað.

Meira kjaftæðið.

Og þetta gleypir fólk í sig. Það var í það minnsta ekki hægt að heyra annað en að stelpurnar sem tóku viðtalið við hann á Rás 2 væru fullkomlega að kaupa þetta. Hvar er gagnrýna hugsunin sem á að vera búið að kenna ykkur í skóla, fraukur mínar?

Svo er það hún Ellý Ármanns, sem veður uppi í öllum blöðum og útvarpsþáttum með dauðans hallærislegt hjal út frá primitívustu gerð af stjörnuspeki. Í einhverjum fjölmiðlum má varla taka viðtal við nokkurn mann án þess að hún sé mætt að til að lýsa viðkomandi út frá stjörnunum. Og öllum finnst auðvitað allt sem sagt er passa rosa vel við sig, enda eru lýsingarnar svo almennar að þær geta átt við hvern sem er. Og það sem ekki passar við viðkomandi dvelur ekki í huga hans eina sekúndu, en hitt stimplast inn og Ellý vex að virðingu. Valkvæm hugsun þar á ferð.

Húmbúkk allt saman.

Í skólakerfinu er börnum boðið upp á endalausar Biblíusögur og „Jesús sagði..“ en engum innan menntakerfisins dettur í hug að innleiða heimspekikennslu fyrir grunnskólabörn og efla með því gagnrýna hugsun. Það er kannski ekki von, því núverandi menntamálaráðherra er mjög trúuð kona og forveri hennar hreinn og klár sköpunarsinni.

Það er mikil forheimskunarbylgja að ganga yfir þjóðfélagið, með tilkomu allra þessara nýju bókstafstrúarsöfnuða og stórfelldri fjölgun í trúarkölti að nafni AA. Jafnvel gerast þær raddir sterkari sem hafna þróunarfræðunum til þess eins að geta haldið á lofti fáránlegum goðsögnum Biblíunnar sem algildum sannleika. Það er ótrúlegt að þetta skuli eiga sér stað mitt í allri þekkingaröfluninni, en kannski skiljanlegt þegar horft er til þess að heimspekin sem praktíseruð er upp í Háskóla nú um stundir er lítið annað en póstmódernískt snakk, þar sem allt má vera satt ef mann langar að það sé þannig.

Guðfræðin er stokkin á þann hest.

Rök- og raunhyggja þykir gamaldags. Samt var það fyrir tilstuðlan hennar sem við drögnuðumst út úr blóðugum miðöldunum og byrjuðum að sjá heiminn fyrir það sem hann er. En eins og horfir er ekki annað hægt en líta á þetta upplýsingaskeið, sem nú virðist vera að líða undir lok, sem góðviðriskafla mitt í ísöld. Seinni miðaldir eru að hefjast og enginn getur vitað hve lengi þetta ástand mun vara. Við erum, að því er best verður séð, á hraðri leið aftur í villimennskuna sem hindurvitnin leiða af sér.

Ábyrgð fjölmiðla er mikil. Það er ekki afsakanlegt að hampa hvaða rugli sem er án þess að votti fyrir gagnrýni. Trúgirnin er okkur nefnilega öllum í blóð borin og ekkert mál fyrir óvandaða svindlara að notfæra sér það. Ég skora á fjölmiðlafólk að breyta um háttu og lesa sér í það minnsta til um þá gagnrýni sem komið hefur fram á hómópata, stjörnuspekinga, reikimeistara, kristni, spákvistabjálfa, kundalini, heilara, nálastungur, hnykklækna, mataræðisbullara, lithimnulesara, geimverutrú, miðla, kristallaorku, græðara, hvítufræði, spákellingar, segulorku, DNA-heilun, blómadropa, mátt bænarinnar, tengslameðferð, orkuvitund, afeitrunarfótanuddtæki, líföndun og hvað þetta peningaplokk heitir allt saman.