Allar færslur Allir flokkar Sos Um félagið Úrskráning Lógó Spjallid@Vantru Póstfang Vantru@Facebook Vantru@Youtube Vantru@Twitter

Ályktun

Með hliðsjón af því
AÐ íslenskir borgarar aðhyllast fjölbreyttar lífsskoðanir;
AÐ borgaraleg réttindi séu í heiðri höfð;
AÐ lífsskoðanir manna séu jafnréttháar hverjar sem þær eru;
AÐ ríkisvaldið skuli ekki fara í manngreinarálit gagnvart ríkisborgurum;
AÐ 62. grein stjórnarskrár lýðveldisins standist ekki 65. grein sömu
stjórnarskrár, og vegi sú síðarnefnda þyngra á metunum;
AÐ sýnt þykir að meirihluti Íslendinga vilji tafarlausan aðskilnað ríkisvalds og þjóðkirkju,

ÁLYKTAR félagið Vantrú
AÐ stefna beri að tafarlausum aðskilnaði ríkis og kirkju;
AÐ festa beri í sessi skilyrðislaust trúfrelsi í íslenskum lögum;
AÐ ríkisvaldið skuli vera veraldlegt og ekki láta sig varða trúmál. Í því felst að tekið skuli fyrir trúboð í grunnskólum;
AÐ Hagstofa Íslands hætti að halda skrá yfir hvaða trúfélögum fólk tilheyrir;
AÐ hætt verði að skrá fólk sjálfkrafa í trúfélög móður þegar það fæðist;
AÐ ríkið hætti að styðja og vernda sum trúfélög umfram önnur;
AÐ ríkið hætti að innheimta sóknargjöld og önnur gjöld fyrir trúfélög;
AÐ ríkið hætti að halda opinbera hátíðisdaga á trúarhátíðum OG
AÐ trúfélögum verði ekki veittar undanþágur eða ívilnanir frá fasteignagjöldum eða öðrum opinberum gjöldum.

Hér með skorar félagið Vantrú á íslenska ríkið, að þegar frumvarp um breytingar á stjórnarskrá verður lagt fyrir Alþingi - og þjóðina - verði þar á meðal frumvarp um aðskilnað ríkis og kirkju. Félagið Vantrú telur að hægt sé að útfæra þann aðskilnað þannig að hann verði Íslendingum til góðs, að eignum kirkjunnar verði ráðstafað skynsamlega, að frídögum verið hliðrað til eða lausnir fundnar, að trúfélög geti bjargað sér upp á eigin spýtur. Við teljum hag fólks best borgið með því að það sé fullkomlega frjálst að velja sér lífsskoðun og, ef það vill, skrá sig í félag um slíka lífsskoðun, en ríkið láti sig það ekki varða umfram önnur félög, enda séu landslög í heiðri höfð.

Ritstjórn 13.06.2005
Flokkað undir: ( Stjórnmál og trú )

Viðbrögð


mofi - 13/06/05 15:55 #

Hjartanlega sammála! Loksins grein sem ég get verið sammála, búinn að bíða lengi :)


Ormurinn - 13/06/05 16:37 #

Húff,

mikið held ég að fólk mundi allrækilega endurskoða afstöðu sína varðandi aðskilnað ríkis og kirkju ef legga ætti niður frí á jólum og páska og hvítasunnu.

Eruð þið með einhverjar pælingar hvernig hægt væri að leysa þetta dilemma?


Birgir Baldursson (meðlimur í Vantrú) - 13/06/05 16:43 #

, ég hef viðrað einhverjar hugmyndir þar að lútandi.


Ormurinn - 13/06/05 22:59 #

Sniðugt. Þú meinar bara að hafa sömu frídaga nema hvað þeir yrðu kallaðir öðru nafni. ekki slæm hugmynd svo sem.

Eiginlega ætti líka að breyta Frídegi verslunarmanna. Það er eina fólkið sem á ekki frí þessa helgi...


Lárus Viðar (meðlimur í Vantrú) - 14/06/05 00:01 #

Það ætti ekki að þurfa að leggja niður jólin þó að Þjóðkirkjan geispaði golunni. Jólin eru ævaforn siður, mun eldri en kristnin trú, og þau verða enn haldin hátíðleg löngu eftir að Jesúdótið dettur uppfyrir.

Síðan væri hægt að taka upp t.d. 1. desember sem almennan frídag, en hann er mun merkilegri dagur fyrir Íslendinga heldur en t.d. annar í hvítasunnu.


Aiwaz (meðlimur í Vantrú) - 14/06/05 09:14 #

Fyrir utan svo það að þessir frídagar eru kjarasamningsbundnir hjá stéttarfélögum og verða því bara ekkert teknir af þótt Krosslafur hætti að vera opinbert ósýnilega ofurmenni Íslands.


Birgir Baldursson (meðlimur í Vantrú) - 14/06/05 10:37 #

Sniðugt. Þú meinar bara að hafa sömu frídaga nema hvað þeir yrðu kallaðir öðru nafni. ekki slæm hugmynd svo sem.

Tillaga mín hljóðar reyndar aðallega upp á að menn fái frídagakvóta sem þeir síðan noti til að velja sér daga, svipað og þegar menn fá sumarfrí. Jólin geta þó áfram verið sameiginlegt frí, enda ekki endilega kristin hátíð.

Lokað hefur verið fyrir athugasemdir við þessa færslu. Við bendum á spjallið ef þið viljið halda umræðum áfram.