Opið bréf til þingseta

Nú standa yfir sýningar á myndinni Mótmælandi Íslands. Þar segir af Helga Hóseassyni. Sá hefur í áratugi barist fyrir að fá staðfest að hann hafi rift samningi þeim sem gerður var við almættið fyrir hönd hans þegar hann var kornabarn. Samning þennan var hann látinn staðfesta áður en hann komst til vits og ára. Helgi hefur barist fyrir trúfrelsi sínu og margsinnis sótt mál sín bæði til ríkisvalds og kirkju án árangurs.

Tjáningarfrelsi Helga hefur margsinnis verið skert og friðsamleg mótmæli hans stöðvuð án þess að nokkur ástæða væri til. Hann hefur lýst því hvernig hann var ofsóttur af lögreglu án þess að vera nokkurn tíma kærður. Þess í stað hefur hann verið niðurlægður, honum misboðið og hann látinn dúsa í fangelsi. Í hvert sinn sem Helgi Hóseasson var fangelsaður var hann í raun fangi Alþingis. Lögreglan var aðeins framfylgja ólögum frá Alþingi og sama gildir um þvermóðsku Hagstofunnar.

Ríkið hefur ekkert með það að gera að skrá hjá sér þær trúarvígslur sem fólk hefur gengist undir. Enn síður á það að vera hlutverk ríkisins að skrá hjá sér í hvaða trúfélagi fólk er. Trú er einkamál hvers og eins. Kröfur Helga eru eðlilegar, kerfið er óeðlilegt.

Helgi er í raun og veru frumkvöðull í mannréttindabaráttu hér á landi. Þegar hann hóf baráttu sína þá þóttu kröfur hans skrýtnar en í dag er öldin önnur og skilningur þjóðarinnar á mannréttindum hefur aukist. Það er kominn tími á að kerfið taki stökk inn í nútímann.

Við sem skrifum í vefritið Vantrú skorum hér með á þingmenn að veita Helga Hóseassyni þá uppreisn æru sem hann á skilið. Það geta þeir gert með því að breyta lögum um Hagstofu Íslands á þann veg að hægt verði að afskrá barnaskírn úr Þjóðskrá. Þetta eru einfaldlega sjálfsögð mannréttindi sem alþingismenn ættu að koma á hið snarasta.